اشمعنا ايران تبقى نووية؟
الشعب المصرى قفش والقرار طلع بعد ما الشعب طالب بالنووى
وان كنت لا اتذكر ان الشعب طلب اى حاجة نووية
الناس عايزة تاكل بيض وفراخ
حاجات اساسية بعد عرفوا ان الحكومة صعب عليها الحاجات المعقدة
مثل المواصلات العامة
او يشربوا مية نسبة التلوث فيها لا تتعدى ال70% او يتعلموا تعليم مافيهوش سيتحد العرب سنة 2000
والسيارات ستمشى بالبطاطا وكل المواضيع المتخلفة فى المناهج المصرية
ازاى يعنى نطالب بالنووى...انا كنت طالب بكلية الهندسة جامعة القاهرة قسم كيمياء
ولم اتعلم شيئا عن الهندسة النووية...لكن علشان هندسة الاسكندرية فيها نووى...لقيت كارنيه النقابة طالعلى اننى مهندس كيميائى ونووى
انت عايز منظر هندسة القاهرة يبقى وحش؟؟؟ ايوة احنا كمان عندنا قسم نووى
ومصر بنت الهرم ...اكيد كلية الهندسة فيها نووى
المهم...سيبك من التعليم وخليك فى الشعب الجعان
ازاى يعنى شعب مش لاقى ياكل حيطالب بالنووى...وكل اللى يعرفوه ان النووى دة بيزعل امريكا
وامريكا بتجيبلنا السمنة والزيت والعيش
المهم القرار طلع...النووى رضوخا لارادة الشعب
طبعا البحث العلمى المصرى آخره يعمل اساتيك ...ودى بجد مش هزار
وزارة الصناعة لا حول لها ولا قوة فى هذا الشأن
لان وزارة الصناعة دورها هو اعطاء تراخيص للمصانع ولم الاتوات
...اما دورها فى التطوير او التخطيط فهو غير موجود الوزارة دة شغلتها الاسترزاق
المصانع تستورد الماكينات من الدول الصناعية...الجمارك تسترزق
الاجانب تعلم المهندسين كيفية التشغيل
المصانع تستورد المواد الاولية...الجمارك تسترزق
المهم النووى دة مش قضية وزارة الصناعة
طبعا الحل الوحيد هو اللجوء للصين
الصين تعملنا مفاعل نووى وممكن يبقى فنارة بليل ويتقلب ديسكو فى الصيف
والصين بالمرة تستوردلنا اليورانيوم
والخبرات
والمهندسين والعمال ويقتصر الدور المصرى النووى على اعطاء التصريحات
ومبروك يا ام بدوى
مصر فيها النووى
جزء من الاحتفالات امام المفاعل النووى
طبعا ناقص نجيب عروسة المولد
واستعراض الفراعنة
