رسالة الى حزب الكنبة العظيم

رسالة الى حزب الكنبة العظيم

حزب الكنبة هو حزب يضم فى عضويته كل من كان يشاهد ثورة شعب مصر فى 25 يناير من خلال كنبة بيته وامام التليفزيون ولم يقم من على الكنبة الا لعمل كوب من الشاى .

حزب الكنبة يضم كل من كان سلبى طوال حياته واثناء الثورة لكنه كان فى منتهى النشاط والحماس لاحباط الثوار واطلاق الشائعات الكنتاكية عليهم. طبعا فيه ناس كبار فى السن واطفال مايقدروش ينزلوا ودول ليهم عذرهم طبعاً

وحزب الكنبة يضم مؤيدين ومعارضين للثورة ويسألون اسئلة ويتطعون للاجابة عنها بالنيابة عن الثوار وشعب مصر المؤيد للثورة وساحاول ان ارد عليهم بدون الدخول فى فذلكة سياسية.

السؤال الأول: مين شباب 25 يناير؟

الاجابة: مافيش وصف محدد للشاب ال 25 يناير...لو قصدكم على ممثلين الثورة..فامافيش برضه ممثل معين..ودة لان الثورة دى جديدة علينا ,,لأننا متعودين ان الثورة شخص...هوجة عرابى..سعد زغلول..جمال عبد الناصر ومحمد نجيب..اما الائتلافات ومجلس الثورة فهى مكونة من نشطاء وحركات سياسية لضمان نتائج الثورة مثل الجمعية الوطنية للتغيير وشباب 6 ابريل والاخوان المسلمين وحركات تانية سياسية وحقوقية مثل كفاية

السؤال الثانى: امال مين وائل غنيم؟

وائل غنيم شاب مصرى يعمل بشركة جوجل الامريكية ومن مؤسسى جروب كلنا خالد سعيد...وهذا الجروب قام بمشاركة حركات سياسية كبيرة فى الاعداد للثورة وهذا الجروب والمشتركين فيه ساهموا فى قلب قضية خالد سعيد لقضية رأى عام واعادة تشريح جثته والعمل على دفع الشباب للخروج الى الشارع فى وقفات احتجاجية صامتة على كورنيش الاسكندرية وكورنيش النيل بمصر وهذا الجروب هو من اختار يوم 25 يناير وجمعة الغضب

السؤال الثالث: بس وائل غنيم طلع ماسونى

حتى لو طلع ابو لهب انت فارقة معاك فى ايه؟ ركز معايا وائل ماقالش انه بطل ولا عايز يبقى جيفارا..وتشويهه دى خطة الحزب الواطى من زمان..يخلى الثورة شخص وبعدين يشوهه..زى ما حصل لنعمان جمعة رئيس حزب الوفد السابق وايمن نور من حزب الغد والبرادعى..نفس الاسلوب البيئة بتاع الحزب الواطى..ومش عارف انتوا يا حزب الكنبة ليه بتقعوا فى نفس الخطأ..وبعدين انت عارف يعنى ايه ماسونى اصلا؟

السؤال الرابع: بس هو فعلا مزقوق من الامريكان علشان طنط جارتنا ابنها ملازم فى المرور عارف كل حاجة

طب وائل غنيم جاسوس..تحب نرجع مبارك؟

السؤال الخامس: طب هو مبارك مش راح شرم..هم عايزين ايه تانى؟

اولا مين هم؟ لو انت مش شايف انك جزء منهم..خليك سلبى وماتعترضش عليهم..اشمعنى يعنى كنت سلبى ومبارك بيورث ابنه مصر ومسلمها لاحمد عز؟..اعتبرهم زى مبارك يا اخى..ولا علشان هم ماعاندهمش امن الدولة تعترض عليهم ومبارك كنت عامل نفسك مش واخد بالك..طب ايه رأيك بقى ..دول اللى شالوا مبارك..تانى حاجة حسنين هيكل التعلب السياسى بنفسه طلع على القناة المصرية اللى تحت سيطرة الجيش وقال مبارك يحكم مصر من شرم..ولا انت بتفهم اكتر من حسنين هيكل وشباب الثورة والجيش اللى سامح بكل دة يتقال..اعمل لك كوباية شاى تانية وركز

السؤال السادس: انا زهقت ما تخليهم يبطلوا يروحو الميدان..مش طالبة زحمة

اكيد لما مبارك وامن الدولة والداخلية ما يقدروش عليهم هم مش هسمعوا كلامك ولا كلامى ولا كلام اى حد الا ما تتحقق مطالبهم...وميدان التحرير اكتسب شهرة عالمية وكل الدنيا مبهورة بينا...انت كدة كأنك بتطلب من الصين تشيل السور العظيم بتاعها علشان سادد عليهم منظر البحر..وبعدين زهقت من ايه؟ دى ثورة مش كرنفال الكربة ولملم

السؤال السابع: بس عيب اللى عملوه فى مبارك ..دة كبيرنا

ممكن اعتبره كبيرنا لو كنا عصابة...يعنى مش محتاج اوريلك كم الفساد والنهب ويكفى ان محمد حسنين هيكل قال على القناة المصرية اللى هى تبع الجيش ان موضوع الضربة الجوية دة كلام مضحك وانه ازاح ابطال اكتوبر كما تزيح المرأة الغيورة ضراتها..وانه كان بياخد 800 900 مليون جنيه من مخصصات قناة السويس لنفسه...تانى حاجة تقدمه فى السن لن تعفيه من المسائلة ولا المحاكمة...ومش من المنطقى رجل استهزأ بشعبه وقال على المعارضة خليهم يتسلوا ونطلع نلطم ونقول له خد الدوا يا ريس ولا لما يلاقى حزبه لاهف كل مقاعد البرلمان ويشكر عز على الهواء على نزاهة الانتخابات ..واقول معلش اصل سنه كبير

السؤال الثامن: بس مش هو اللى بيعمل كدة..دة ابنه واللى حواليه

وهو صغير مش واخد باله ان الوزرا دخلوا الحزب ورشحوا نفسهم فى مجلس الشعب وبيسرقوا؟..اذا كنت انا عارف وانت عارف..هو مش هيعرف؟

السؤال التاسع: طب ايه موضوع حكومة تكنوقراط دى؟

تكنوقراط يعنى ناس محترمة ليها خبرة فى مجالها ولا تنتمى لحزب ومحبوبة بين الناس..كأنك مسكت احمد زويل التعليم

السؤال العاشر: الاخوان الاخوان..يا خرابى..القرضاوى جيه ..احييه احييه

انشف ناشف كدة وماتقعدتش تلطم زى اسرائيل وبطاقتك فى ايدك انزل وانتخب

السؤال الحادى عشر: طب انتخب مين؟

الثورة قامت علشان ماحدش يبقى وصى على حد ويقول لك انتخب مين..اتعب شوية واقرا البرامج الانتخابية وانت على الكنبة

السؤال الثانى عشر: يعنى عاجبك اللى حصل فى مصر دة؟

لو قصدك على التلاتين سنة بتوع حكم مبارك اكيد مش عاجبنى..لو قصدك على الحرق وتهريب المساجين برضه مش المتظاهرين..مين اللى طلعهم..انا مش النيابة ولو ردك ان المباحث هى اللى طلعتهم يبقى انت رديت على نفسك خلاص وعرفت مين اللى كان خارب البلد

السؤال الثالث عشر: طب والمطالب الفئوية

واضح انك ناسى الاعتصامات اللى كانت قدام مجلس الشعب..المطالب دى من زمان وهى شغالة وماحدش عبرهم..ابتدوا من قبل الثورة وانضموا للثورة ولسة مكملين

السؤال الرابع عشر: بس دى هتخرب البلد

اللى خرب البلد جهاز امن الدولة اللى كان معين ناس فى نقابات العمال وكل النقابات وماكانتش بتجيب للناس حقوقها

السؤال الخامس عشر: ايه الثورة المضادة؟

الثورة المضادة انك تلاقى حسام البدراوى عضو الوطنى السابق بيعمل حزب اسمه 25 يناير..وانك تلاقى اشاعات عمالة تطلع من رجالة صفوت الشريف لافقادك الثقة فى الثورة والشباب اللى عملوها فتختار واحد كنت تعرفه من النظام القديم..الثورة المضادة انك تلاقى رجالة امن الدولة بتولع بين الناس وتبعت الرجالة والبلطجية تسرق وتقتل وتقومك على الداخلية فى نفس علشان الثورة ما تنجحش وتتمنى عودة حد من النظام القديم على اساس انه فاهم فى البلد

السؤال السادس عشر: يعنى بعد الثورة كيس المكرونة هيبقى بكام؟

يا ريت نبص لابعد من كيس المكرونة والفرخة..25 يناير المطالب كانت عيش..حرية..عدالة اجتماعية..لو حاسس ان الكلام دة ميأكلش عيش..هاقولهالك بالطريقة اللى انت تفهمها..لما مديرك ما يدفعش رشوة علشان المسئول الفاسد هرب بعد الثورة او اتقبض عليه..الفلوس الزيادة اللى مع مديرك دة مفروض يشبرئك بيها او يكبر البيزنس فتكبر انت معاه او يرخص الاسعار علشان

المنافسة فكيس المكرونة بتاعك هيرخص

السؤال السابع عشر: يا عم امريكا واسرائيل وايران هتحتلنا بسبب الثورة

اسرائيل بعد اول يوم من الثورة وهى عاملة زى النسوان وعمالة تلطم..على الغاز ومعاهدة السلام وبان قد ايه هو ضعفاء..وبعد الضغط الشعبى الغاز انقطع عنهم.زولما فتحوا بقهم زيادة الجيش سمح بعبور سفينيتين ايرانيتين فاتلموا خالص وابتدوا يدوروا على غاز عندهم..وبالراحة كدة مع بعضينا..بن اليعازر مدير الموساد السابق قال على مبارك كنز استراتيجى لاسرائيل..ليه؟علشان مبارك كان بيغذى فينا فكرة الرعب من اسرائيل بقالوا تلاتين سنة..دة غير انه كان بيديهم 40 % من الغاز الطبيعى بتاعهم. بتلت الاسعار العالمية..وبعد ما قفلنا الحنفية..عملوا ايه؟ ولا حاجة..وامريكا تحتلنا ليه..طب والكونجرس واعداء اوباما السياسيين هيسيبوه مثلا ومايستغلوش الظروف..انشفوا بقى وشوفوا الدنيا بتقول علينا ايه منهم اوباما نفسه اللى عايز يحتلنا..اما عن ايران..فهى اصلا مش عدو وعندها ثورة..ومن الاخر لا ينصح باحتلال دولة قامت فيها ثورة وتعداد سكانها تمانين مليون

السؤال الثامن عشر..ايه العلمانية ولعياذ بالله

العلمانية مش معناها الكفر والالحاد..فصل الدين عن الدولة تشريف للدين والمثال واضح وقريب..لما شيخ الازهر اتدخل فى السياسة وفتى بعدم جواز صلاة الجمعة وقت الفتن لاجهاض جمعة الغضب والبابا شنودة لما قال ولادنا مايتظاهروش ودة كان تأييد منهم لمبارك..ايه اللى حصل؟ ماحدش سمع كلامهم ....وبقى ايه منظر الازهر وكنيسة الاسكندرية؟ مش كان احسن مايتكلموش..فصل الدين عن الحكومة مش معناه فصل الدين عن مصر..معناه منع تدخل الحكومة فى تعيينات الازهر والأئمة.

ومايتدخلوش فى السياسة؟..شفت لما السياسة بتدخل فى الدين ايه اللة بيحصل؟..شفت ايران مثلا لما رجال الدين ايدوا الثورة المصرية وبعدين قتلوا المتظاهرين المؤيدين لنفس الثورة؟

ومشكلة العلمانية انها كلمة بقت سيئة السمعة من تأثير النظام

السؤال التاسع عشر: طب انا ليه حاسس بالقلق

منطقى جداً...دى اول ثورة تشوفها...والوضع جديد ولازم تقلق ولازم تتفائل..اسرائيل فقدت حليفها الاول والشعب فاق..وانت لازم تبتسم وتشكر الشباب اللى ماتوا علشان انت تخلص من عصابة مبارك

السؤال العشرين: طب انا مين وتبع ايه ونزلت المظاهرات ولا لأ واخدت لك كام رصاصة؟

انا اسمى عزت امين ونزلت او مانزلتش دة بالتعبير السياسى "شأن داخلى" وكل ثورة وانتم طيبين

عزت أمين

مستر اكس والاستفتاء المضاد...الجزء الأول

مستر اكس والاستفتاء المضاد

فيه الغاز عجيبة فى الثورة وكلنا عارفينها مما يدفعنى الى الاقتناع ان هناك مستر اكس ومش قصدى انه الجيش لان صفوت الشريف لازال حرا طليقا..

دلوقتى فيه قوى سياسية كتيرة بعد الثورة..الاخوان اسهمهم فى السما واخيرا اكتسبوا تعاطف النخبة والمثقفين بعد ما فقدوها من ساعة حادث المانشية..دة حتى نجيب ساويرس قال فيهم بقين حلوين,,..دلوقتى الائتلاف والاحزاب ومرشحين الرياسة والله يهدهم النشطاء ومعاهم الاخوان ممكن ياخدوا مجلس الشعب بتاعنا وبتاع الدول العربية كلها ولو اتحالفوا ممكن يرجعوا بكاس العالم.

مستر اكس لعب لعبة ذكية جدا..وبالرحة كدة مع بعضينا

هل الاستفتاء دة مصيرى بالنسبة للجماعة؟

خالص...ناس شغالة بقالها تمانين سنة فى الشارع السياسى هيفرق معاهم تأجيل كام شهر للانتخابات..ممكن يكون مصيرى بالنسبة للقوى السياسية الاخرى

هل الاستفتاء يخلى الاخوان يعلنوا الجهاد لنصرة الاسلام؟

لأ برضه..عادى يعنى استفتاء على مواد ترقع دستور هيتغير هيتغير..هو الخلاف ما بين نعم ولا كان على جدول زمنى وشكل قانونى...يعنى الاخوان ممكن يرفعوا راية الجهاد لو كان فيه اقتراح مثلا بالوحدة مع اسرائيل

هل السلفيين ممكن يكفروا حد او مجموعة بسهولة؟

شئ صعب على اى سلفى..دة محتاج يقعد يراجع مشايخه وكتبه وبعدين يستنى الفتوة ويتأنى ويكون ميعاد الاستفتاء راح..دول على ما ياخدوا رخصة الخروج على مبارك الثورة هتكون خلصت والرئيس الجديد هيكون بيخلص مدته التانية

هل عبود الزمر نفسه ممكن يكفر المعارضين للتعديلات؟

لأ طبعا..هو قعد يشرح امنى الشاذلى خطوات قتل رئيس جمهورية بمنتهى الوضوح فما بالك بقتل اربعة مليون معارض حسب الاستفتاء

امال مين اللى كان بيوزع المنشورات التكفيرية دى؟

هل الاخوان من السذاجة انهم يبعتوا ستات على البيوت يقولوا الحقوا المسيحين عايزين نجيب ساويرس رئيس لازم تصوتوا بنعم؟

ومن وسط الاف الافتات للاخوان مين اللى حط لافتة بتقول التأييد واجب شرعى واتلاقت اليافطة دى وكمان اتصورت..ايه الصدف السعيدة دى؟

ويعملوا كدة ليه اصلا؟

انا ممكن ادعى ان الاخوان ممكن يعملوا الهيستريا الدعوية دى لو كان الاستفتاء هل تؤيد حل الجماعة ام لا...لكن استحالة يجيبوا لنفسهم وجع الدماغ والهجوم الاعلامى والفيسبوكى على استفتاء غير مصيرى بالنسبة لهم لان الاعلان الدستورى سيتم فى جميع الاحوال.

بس فيه شيوخ جوامع كفروا المعارضين..مين دول؟

حلو قوى..السلفيين والاخوان لسة طالعين من المعتقل وقلنا ان التكفير شبه مستحيل عند الاخوان وبطئ بطئ بطئ عند السلفيين ..تفتكر يعنى شيوخهم هيقولوا كدة ليه؟ ما يقولوا روح قول نعم وخلاص..ليه اعلان الجهاد وتعمد احداث الفتنة دة؟..وبعدين احنا ناسيين مين كان بيعين الشيوخ فى المساجد؟ امن الدولة.. ...واستخدم اكس الاشاعات لدرجة ان فيه ناس كانت رايحة تتنخب علشان المادة التانية ماتتلغيش والمسيحيين ما يمسكوش البلد... ودة خلى الاستفتاء يأخذ شكل انقذوا الاسلام الى الجهاد... يعنى احنا لازم يتضحك علينا بفتنة كل اسبوع؟

طب مستر اكس استفاد ايه من كل دة؟

استفاد كل حاجة...خوف الناس من الاخوان ورجعهم فزاعة مرة تانبة لان حجمهم ممكن يكبر لو اكتسبوا المزيد من التعاطف الشعبى...خلى القوى السياسية وائتلاف شباب الثورة والاحزاب واربع مرشحين للرئاسة والمثقفين والفنانين والاقباط . ياخدوا 22% فى الاستفتاء...

وفرح الشعب بالصباع البامبى..وبعد النتيجة الوضع صبح كالتالى

الاخوان مكروهين وعادوا ليؤدوا دورهم كفزاعة بجدارة غصب عنهم

التكتلات السياسية اللى كانت بتطالب بمطالب الثورة ومعاهم مرشحى الرئاسة اخدوا 22%

يعنى لم ينجح احد

مين دلوقتى ممكن يقعد ويحط رجل على رجل ويتنفش ويقول انا باتكلم نيابة عن شعب مصر؟

اللى اخدوا 22% ولا الفزاعة؟

ومش غريبة ان الحزب الواطى المكروه يعلن تأييده للتعديلات بعد الاخوان ما اعلنوا دة؟

يعنى انا لو واطى ومكروه وشفت الاخوان بيأيدوا اقعد ساكت خالص واسيبهم يشتغلوا واحصد انا بقى على المرتاح

لكن مستر اكس عايز يشوف كلمة الاخوان والوطنى ايد واحدة,,ومستر اكس عايز الاعلام يهتم بعبود الزمر..ما كله عند الشعب اسلاميين وبيخوفوا وبيقطعوا الايدين وبيغتالوا السادات

حقيقة انسانية كونية..لو القوى السياسية والاخوان ماتحالفوش..الحزب الواطى هيبلع البرلمان..مرة باسم حزب 11 فبراير ومرة باسم 25 يناير ومرة الحرية ومرة الشباب ومرة مستقل واسماء جديدة وشباب بيقول انا قتلت واتقتلت فى التحرير

ودلوقتى مستر اكس ممكن يولع فى البلد بسهولة بميسد كوول..البلد متعبية..الاسلاميين ضد اعداء الاسلام (مسيحيين وعلمانيين وممثلين ويساريين وليبرالين) اشاعة تطلع ان فيه مظاهرة تقول ان المسيجيين او العلمانين رافضين الاستفتاء وعايزين يلغوا المادة التانية..وولع فى البلد بس مش على مستوى قرية.زى اللى عملوها امن الدولة.لأ المرة دى على مستوى البلد كلها

الجيش ممكن يكون عاوز يخلص من مستنقع مبارك اللى دخل فيه والاستفتاء هام من الناحية القانونية حتى لا تصبح الثورة انقلاب والارادة الشعبية شاركت بالفعل والدليل الاقبال الجماهيرى وهو دة هدف الاستفتاء

التعبئة الاعلامية كانت مبالغ فيها ..التعبئة الدينية كانت كارثة...والتعبئة المضادة من الفنانين والكتل السياسية فرقتنا وبيان الكنيسة كان مستفز وساهم فى احتقان طائفى والاخوان ظهورهم المتكرر على كل القنوان للدعوة بالتصويت بنعم برضه غلط وخلق وهم الحشد والفتنة..كان لازم الكل يتعامل مع الموضوع على انه استفتاء وخلاص..كدة تحول للاستفتاء المضاد من مستر اكس

صالحوا الناس اللى قفشتم عليهم بسبب الاستفتاء وتعالوا نركز ان الانتخابات تبقى بالقايمة النسبية وبلاش الهجوم على بعض ونكفر ونخون احنا كل اللى بنعمله بنخلى رجل عجوز يضحك فى شرم الشيخ

مستر اكس والبلاى ستاشين

مستر اكس والبلاى ستاشين

الجزء التانى

ملأ فيديو الشيخ حسين يعقوب الفضاء الاثيرى (الانترنت) الذى ينقل فرحة الاسلاميين بنجاحهم فى غزوة الصندوق. وحدث رد الفعل المتوقع من هجوم عنيف على الشيخ حسين يعقوب وفى المقابل انتشى محبى الشيخ من الاسلاميين بالنصر المبين. والحقيقة من كسب فى هذه المعركة بلا منازع هو مستر أكس الذى يدير شئون البلاد كالبلاى ستاشين.

اللى خلى مبارك يمشى ماكنتش فتوة من الازهر ولا من المشايخ ولا توصيات البابا شنودة ولا كلام حزب الكنبة الداعى للاستقرار ولا كلام الفنانة عفاف شعيب المنهارة من اغلاق محلات الكباب. اللى مشاه هو اتحاد المصريين جميعا من اجل هدف مشترك ومواجهة عدو مشترك وهو نظام مبارك الفاسد.

نظام مبارك وحد عليه كل صفوف الشعب ..لأن السلفى اللى كان بينزل يصلى الفجر بيعتقلوه والمسيحى اللى كان رايح القداس بيفجروه وبعدين يتهموا السلفيين ويعذبوهم ويروحوا يعتقلوا الاخوان قبل انتخابات الجامعة ويحطوا على الليبراليين رقابات من موظفين مابيعرفوش يفكوا الخط ويحطولهم مادة 76 ويسمحوا للفن السفيه بالنمو واليساريين يتهموهم بالشيوعية والالحاد وتبادل الزوجات ثم يجعلوا المتطرفين يقتلوا فرج فودة ويحاولوا اغتيال نجيب محفوظ . ويقولوا للكل شفتم لو احنا مشينا من البلد هيحصل ايه؟ الاسلاميين هيكملوا قتل والليبراليين هيمنعوا الحجاب والشيوعين هيبدلوا زوجاتهم معاكم..احمدوا ربنا على مبارك والاستقرار

فيه بعض السلفيين خايفين من التيار الليبرالى لايسمح بالشذوذ الجنسى ويمنع اقامة الصلاة؟

مش واخد بالك ان دة نفس الكلام اللى كان بيقولا مبارك عليكم بس بالعكس..كان بيقول لو الاسلاميين مسكوا هيحجبوكم بالعافية ويقطعوا ايديكم

هل هذا حوار؟

اختصر بعض السلفيين الليبرالية فى السماح بالشذوذ والخمر ومنع الحجاب والليبرالين اختصروا السلفية فى دقن ومسواك ونقاب وتحريم ظهور بطوط عارى الجزء الاسافل فى مجلة ميكى

هو دة اللى هيخلى مصر تبقى دولة عظيمة؟

طب بشرى للبنات متقبات او محجبات او لأ..انتوا التلاتة الشباب الحوش بيعاكسكم..ليه ماتتكلموش مع بعض وتشوفوا حل للموضوع ده او على الاقل هتلاقوا موضوع مشترك تتكلموا فيه..اتكلموا مع بعض..ماتقنعوش بعض بحاجة..من فضلكم اتكلموا مع بعض.

ويا استاذ يا ليبرالى ايها الداعى للحريات ما تسيب اللى يربى دقنه يربيها ولا يلبس جلابية ولا يقصرها...ويا استاذ يا سلفى انزل واختلط بالمجتمع اكنر..خلاص مبارك مشى وماحدش بيعاديك..ماتسمحش لنفسك تبقى فزاعة.

مش ممكن يبقى مصير بلدنا مرهون بالبيرة والبيكينى والنقاب غزوات الصندوق..نبقى احنا كدة كلنا لبسنا فى الحيطة ونستاهل اللى يجرى لنا.

انا مش مصدق ان استفتاء على تمن مواد فى الدستور تختص بترشيح رئيس الجمهورية يعمل كل دة

رفع المسيحيين راية انقذوا الكنيسة والسلفيين راية الجهاد على اعداء الله والليبراين رفعوا شعار سنموت من اجل الحرية والاخوان رفعوا شعار سنقاتل من اجل تنفيذ اوامر المرشد.

ايه يا مصريين؟ خير؟ انتوا نسيتوا مين تزل الشارع وعرض حياته للخطر؟

المسيحين نزلوا عكس اوامر البابا والمسلمين نزلوا وخالفوا فتاوى الازهر ومشايخ السلفية..والاخوان نزلوا مع ان المرشد العام صرح ان الجماعة لن تشارك والشباب نزل الشارع متحديا رغبة اهاليهم.

مافيش حاجة توحدنا؟

مافيش ان معظم رؤوس الفساد لسة شغالة وحرة؟

ناسيين ان الصحف لسة بتهاجم البرادعى يعنى لسة فيه اوامر وناس بتنفذها؟ ليه ما نقاطعش الجرايد دى ونعمل حملة تضامنا مع الصحفيين الشرفاء اللى عايزين يشيلوا اسامة سرايا وهو مفروض عليهم؟

نسيتوا ان فيه ناس حواليكم بتتكلم فى السياسة زى ما كانت بتتكلم فى الكورة الحاجة الوحيدة اللى يعرفوها؟ لازم نفهمهم ان يرتقوا بفكرهم عن الاهلى والزمالك فى السياسة؟

نسيتوا ان فيه شباب بيتعامل مع المرشحين زى ما كانوا بيتعاملوا مع نجوم السينما؟ ..انا هاختار فلان علشان شكله حلو وبيعرف يتكلم..ياترى عمرو حمزازى متجوز ولا يسر فودة لازم يغير تسريحة شعره وانا ارشحه يبقى رئيس جمهورية...دول لازم يفهموا ان صوتهم ممكن يودينا فى ستين داهية

مافيش فقرا ننزل نساعدهم؟ مافيش اميين نعمل نتطوع ونعلمهم؟

مافيش اننا نعرف مين مرشح دايرتنا فى مجلس الشعب اللى فات علشان نعرف الفاسدين؟

الامثلة اللى فاتت دى تفرق معاك انا لبيرالى ولا سلفى ولا اخوان ولا يسارى ولا بتنجانى؟

اللى فات دة مش ممكن المنقبة والمسيحية والملتحى والعلمانى والشاب السيس يتعاونوا مع بعض علشان يبقى فيه ضغط شعبى ونعمل توعية؟

مش شايفين ان تظاهر امناء الشرطة المطالبة بعودة محمود وجدى وحرق مبنى الداخلية يكشف ان مستر اكس اقوى من كل التيارات ولا يرضى بوجود الشرفاء فى الوزارة؟

وازاى السلفيين فاكرين انهم ممكن يمسكوا البلد والفساد معشش فيها ومشايخ وأئمة مساجد وزوايا تم تعيينهم من امن الدولة وهم اللى بيحركوا الجماهير بجد مش انتم ولا الاخوان..خليك واقعى..هم اقوى منكم بالفعل....والليبراليين ازاى ممكن تدعوا للحريات والاعلام والصحافة وقصور الثقافة وكل المؤسسات والمجالس المحلية والكليات لسة فيها الوطنى قاعد ومربع؟ وللثوار المنتشين بقهر جهاز امن الدولة..مين اللى فتح ليكم بوابة مقر مدينة مصر من الداخل؟ وللقوة السياسية مين اللى اداكم 22% فى الاستفتاء واسقط عنكم شرعية التحدث باسم الثورة؟

والله لو فضلنا نهاجم بعض هنسلم البلد تسليم مفتاح لمستر اكس وهنخلى رجل عجوز فى شرم الشيخ يضحك علينا.

نتكلم مع بعض..كلنا..ودلوقتى

حملات مقاطعة الجرائد القومية حتى ترحل ابواق مبارك

حملات لمساعدة ابناء ماسبيرو الشرفاء لاقالة رؤوس الفاسدين الاعلاميين

حملات تأييد لوزير الداخلية الجديد منصور العيسوى للرد على محاولات اعادة محمود وجدى

حملات

انزل اسأل اصحاب المحلات عن المرشح السابق لان اصحاب المحلات هم اللى كانوا بيعلقوا اليفط بتاعة المرشحين. ولما تعرفوا اعرف تاريخه.

فى الجامعة ياريت المسيحيين بلاش ناخد جنب ولما تيجى واحدة منقبة معدية نوطى صوتنا ونبص عليها..روحوا كلموها..انتوا بنات مع بعض وهتلاقوا مليون حاجة مشتركة انشالله نجيب مرايا جديدة للحمام بتاع البنات..اى موضوع..مهما كان تافه...اسر التيار الاسلامى فى الجامعة..احتضنوا المسيحين واشركوهم معاكم..على فكرة هم عندهم ملاعب كورة فى الكنيسة ممكن تلعبوا معاهم بس بلاش فريق مسلمين وفريق مسيحيين. الاخوة الليبرالين بلاش لما نشوف واحد بدقن نقوله اخبار بن لادن ايه..علشان هو سمع النكتة دى مليون مرة ومابقتش تضحك

اتحادنا مع بعض يفزعهم..بقى بعد الفتنة باسبوعين كلنا ننزلق فى نفس الفتنة فى الاستفتاء؟ انا كمان بلعت الطعم بس فقت...لازم نتقبل بعض ونشتغل مع بعض..نحن لم نسقط النظام بعد.