ضاقت الدنيا عليها
وقالت الفرج قرب
شافت فى مرايتها عينيها
نظرة اللى شاف و اتغرب
فكرتها دمعة سايلة
بطفلة كانت بتفرح
رجعتها كلمة قايلة
ايه شفتيه مش بيجرح؟
دة كل واحد ايده طايلة
مسك لك خنجر بيدبح
من كتر جراحك نسيتيها
وقعدتى تدورى
ايه الذنوب اللى عملتيها
وعليها بتكفرى؟
دة حتى حبيبك من غله خنجره وقع
ناولتيهله اكل فى لحمك لحد ما شبع
الخنجر من كسوفه لان وفى لحمك انتى
طب ازاى نصل بارد يبقى احن على الضنا؟
رفع ابو زيد سيفه افتكرتيه هينصرك
اتارى الندل كيفه انه راخر يظلمك
رفع سيفه قبالك وقال على الدور
خاف يقتلك ادامك راح مطفى النور
فى الضلمة منعتى دمعة
وحلفتى ما تشتكى بكلمة
واستنيتى السيف يخلصك
ولدنيا احن يوصلك
سمعتى فى الضلمة صرخة بس مش من حلقك
وغرقتى فى دم سايح والغريبة انه مش دمك
وسمعتى اعلى آهة بس مش من جوة قلبك
طلعت من الناس القاسية اللى كانوا جانبك
نورتى بايديك شمعة تشوفى اللى حواليكى
لقيتهم غرقانين فى دمهم تحت رجليكى
الاندال طعنوا بعض بدل ما يخلصوا عليكى
بيبكوا تلحقيهم, ما حياتهم بقت فى ايديكى
صعبوا عليكى اللى قتلوقى
كان صعب تشوفيهم بيترجوكى
فعاهدت كل اللى خانوكى
وطمنتى اللى كانوا بيخوفوكى
هتنقذيهم لو ردوا على سؤال واحد
السؤال؟
هتعرفى
هترتاحى
لكن
من كتر جراحك نسيتيه
وقعدتى تدورى
ايه الذب اللى عملتيه
وعليه بتكفرى؟
